Del VKM-ja/ “Turizmi” i “rrëmben” 45 milionë lekë Ministrisë së Financave

(Skenderbeu.info)-Del VKM-ja/ “Turizmi” i “rrëmben” 45 milionë lekë Ministrisë së Financave

Në mbledhjen e sotme të Këshillit të Ministrave, është marrë një vendim për rishpërndarje fondesh.

Konkretisht Ministrisë së Financave i janë hequr 45 milionë lekë nga fondi vjetor dhe këto para kanë kaluar në buxhetin e Ministrisë së Turizmit.

Këto para, sipas VKM-së, do të përdoren për zhvillimin dhe promovimin e destinacioneve, produkteve dhe diversifikimin e ofertës turistike në turizëm.

Vendimi i Këshillit të Ministrave:

Vendim për rishpërndarje fondesh në buxhetin e miratuar për vitin 2023, ndërmjet Ministrisë së Financave dhe Ekonomisë dhe Ministrisë së Turizmit dhe Mjedisit.

Në mbështetje të nenit 100 të Kushtetutës, të nenit 44, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të nenit 17, të ligjit nr.84/2022, “Për buxhetin e vitit 2023”, me propozimin e ministrit të Financave dhe Ekonomisë dhe të ministrit të Turizmit dhe Mjedisit, Këshilli i Ministrave.

Vendosi:

1. Ministrisë së Financave dhe Ekonomisë, në buxhetin e vitit 2023, në programin “Tregu i punës”, në artikullin 606, i pakësohet fondi prej 45 000 000 (dyzet e pesë milionë) lekësh.

2. Ministrisë së Turizmit dhe Mjedisit, në buxhetin e vitit 2023, në programin “Zhvillimi i turizmit”, në artikullin 604, i shtohet fondi prej 45 000 000 (dyzet e pesë milionë) lekësh për zhvillimin dhe promovimin e destinacioneve, produkteve dhe diversifikimin e ofertës turistike në turizëm.

3. Ngarkohen Ministria e Financave dhe Ekonomisë dhe Ministria e Turizmit dhe Mjedisit për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.