(Skenderbeu.info)-Rodrygo bën heroin, Real Madrid fiton Copa Del Rey, trofeu i 20-të në histori
Real Madrid triumfoi 2-1 ndaj Osassunas në Estadio de La Cartuja, në finalen e Copa del Rey, duke marrë këtë trofe për herë të 20-të në histori të klubit. Ekipi i Arrasates rezistoi vetëm një minutë. Një goditje e Rodrygos gjeti rrjetën, pas një asisti të Vinicius nga krahët.
Madrilenët insistuan për golin e dytë dhe do i afroheshin shumë në minutën e 25-të. Karim Benzema goditi bukur brenda zonës, por e menjëhershme ishte kundërpërgjigja e portierit Sergio Herrera.
Abde Ezzalzouli provoi befasinë në radhët e Osassunas, por sfera u devijua nga mbrojtësit.
Rastet s’do mungonin në fundin e fraksionit. Në të 32-tën, Alaba “flirtoi” me golin. Mbrojtësi ishte i pafat, pasi me një goditje dënimi sfera preku traversën.
Në fillimin e pjesës së dytë, Torro vendosi ekuilibrat. Rodrygo i riktheu sërish epërsinë skuadrës së Ancelottit (70’), rezultat që do mbetej i pandryshuar deri në fund.
