Qeveria Kurti: Qytetarët e Kosovës do të lëvizin pa viza që nga 1 janari 2024

(Skenderbeu.info)-Qeveria Kurti: Qytetarët e Kosovës do të lëvizin pa viza që nga 1 janari 2024

“Qytetarët e Kosovës lëvizin pa viza që nga 1 janari 2024″, deklaroi sot qeveria e Kosovës në një njoftim zyrtar.

“Liberalizimi i vizave tashmë është realitet. Ditën e sotme u votua pozitivisht në Parlamentin Europian dhe vendimi final mbi liberalizimin e vizave, – thuhet në njoftim. – Ai do të nënshkruhet zyrtarisht ditën e nesërme në Strasbourg nga Parlamenti Europian dhe Këshilli i BE-së, ku do të jetë prezent dhe zëvendëskryeministri Bislimi.

Vendimi do të publikohet në gazetën zyrtare dhe hyn në fuqi 20 ditë pas publikimit. Sipas këtij vendimi, qytetarët e Republikës së Kosovës do të mund të lëvizin pa viza në zonën Schengen dhe atë jo më vonë se data 1 janar 2024.

Rregullat e reja mbi heqjen e regjimit të vizave për Kosovën do t’i lejojnë qytetarët të udhëtojnë në BE pa viza për një periudhë qëndrimi prej 90 ditësh në çdo periudhë 180 ditore. Kosova i kishte plotësuar të gjitha kushtet për liberalizimin e vizave me kohë, por deri më tani mungonte konsensusi në mesin e vendeve anëtare për avancimin e procesit.

Falë punës së Qeverisë sidomos në fushën e sundimit të ligjit, luftës kundër korrupsionit e menaxhimit të migrimit u arrit zhbllokimi i procesit dhe bindja e institucioneve të BE-së dhe vendeve anëtare se Kosova meriton përfundimin e procesit të liberalizimit të vizave dhe se vendi ka bërë progres e arritje të rëndësishme në fushat relevante.

Pas një pritjeje të gjatë, ky është një moment kyç i përafrimit të vendit tonë me familjen europiane.”