(Skenderbeu.info) Polonia kritikon qëndrimin “e papranueshëm” gjerman ndaj tankeve Leopard.
Kryeministri i Polonisë kritikoi sot vendimin e Gjermanisë për të mos furnizuar Ukrainën me tanke Leopard, duke e quajtur qëndrimin e vendit “të papranueshëm”.
Berlini ka hezituar të dërgojë tanke të rënda ose të lejojë vendet e tjera t’i transferojnë ato në Kiev.
“Qëndrimi i Gjermanisë është i papranueshëm. Ka kaluar gati një vit që nga fillimi i luftës. Njerëz të pafajshëm po vdesin çdo ditë”, tha kryeministri Mateusz Morawiecki për agjencinë PAP.
“Bombat ruse po bëjnë kërdi në qytetet e Ukrainës. Objektivat civile po sulmohen, gra dhe fëmijë po vriten”.
Të premten, rreth 50 vende ranë dakord t’i sigurojnë Kievit pajisje ushtarake me vlerë miliarda dollarë, duke përfshirë automjete të blinduara dhe municione të nevojshme për të shtyrë forcat ruse.
Por ministri gjerman i mbrojtjes Boris Pistorius tha megjithë pritshmëritë e rritura, “ne ende nuk mund të themi se kur do të merret një vendim dhe cili do të jetë vendimi, kur bëhet fjalë për tankun Leopard”.
Gjermania është prodhuesi i tankeve Leopard dhe kryeministri i Polonisë tha gjithashtu se ishte duke pritur për “një deklaratë të qartë” nga Berlini nëse vendet që kanë Leopardët mund t’i transferojnë ato në Ukrainë.
Polonia ka njoftuar se është gati të dorëzojë 14 tanke Leopard në Kiev dhe thotë se është duke e diskutuar këtë çështje me rreth 15 vende.
Nëse Berlini refuzon t’i furnizojë Ukrainës me tanke, “ne do të krijojmë një “koalicion të vogël” vendesh të gatshme për të dhuruar disa nga pajisjet e tyre moderne, tanket e tyre moderne,” tha Morawiecki.
Në një deklaratë të përbashkët të shtunën, ministrat e jashtëm të tre shteteve baltike i kërkuan Gjermanisë “të sigurojë tanke Leopard në Ukrainë tani”.
