(Skenderbeu.info)-KURBANI I RADHES
Janë gjithmonë intriguese mendjet e mbrapshta, si përshembull vrasësit serialë apo subjektet e tjera të fushës së kriminalistikës. Studiuesit e kësaj fushe nuk kanë arritur ende të shpjegojnë fenomene të cilat shkojnë kundër logjikës njerëzore.
Përshembull, përse disa njerëz me mendje të mbrapshtë kanë tendencën të “dekonspirojnë” vetveten dhe të aludojnë që përpara se të kryejnë një akt kriminal apo të rrezikshëm, vetëm e vetëm që të ndihen “superiorë” ndaj të gjithë të tjerëve, të cilët, sipas mendjes së tij, nuk e kuptuan që në fillim qëllimin e tij të mbrapshtë.
Një çështje tjetër ende e pashpjegueshme plotësisht është edhe fakti se si pothuajse të gjithë kriminelët apo vrasësit serialë, me kalimin e kohës kanë tendencën të bëhen repetitivë, pra të kryejnë aktin e tyre në të njëjtën mënyrë, përsëri e përsëri, pasi fillojnë ndjejnë kënaqësi nga rituali që kanë krijuar për mënyrën e kryerjes së krimit. Koha nuk fal askënd dhe, duke u bërë i parashikueshëm, në fund këta persona kapen pikërisht për fajin e tyre.
Këto dy elementë psikologjikë mund ti vëresh qartësisht tek autokrati ynë i dashur. Përshembull: sa herë afrohen zgjedhjet më kujtohet shprehja e famshme: “Vjedh Shqipërinë për të vjedhur votat, dhe vjedh votat për të vjedhur Shqipërinë”, një aludim pra për planin e tij, që në atë kohë. E sa herë shikoj koncerte me këngë e valle nëpër Tiranë (të cilat, ma do mendja, do të shtohen në frekuence gjatë muajve të ardhshme), më kujtohet shprehja: “Bukë dhe Cirk do populli, BUKE dhe CIRK.” i një shpirti binjak me atë të autokratit.
Por, kohët e fundit, nuk e di se si (për dreq) më vjen gjithmonë e më shpesh ndërmend titulli i një romani të famshëm: KURBAN! Mbase është thjesht përshtypja ime por, sa herë më vjen ndërmend ky titull, më kujtohen 4 viktimat e 21 Janarit 2011, gjaku i të cilëve shërbeu si “katalit” për marrjen e pushtetit. Ndonjëherë me kujtohet edhe viktima në Elbasan, pak ditë përpara zgjedhjeve të vitit 2021, por kohët e fundit, nuk e di pse, më kujtohet edhe Gert Shehu, edhe pse ky i fundit (fatmirësisht) nuk mbeti viktimë.
Mbase pushteti, që të merret e të mbahet ka nevojë për…KURBAN? Mos vallë Gert Shehu (me probleme mendore apo jo) ishte përgatitur si kurbani i radhës? Mbase ai duhej të vritej në shesh nga protestuesit e zemëruar për ti treguar shqiptarëve dhe të gjithë liderëve europianë, të mbledhur diku aty pranë, sesa kriminale është opozita shqiptare, që vrau në shesh një “gjynahqar” me probleme mendore. Ishte përgatitur dhe shpërndarë edhe dokumenti, që të ishte gati sapo të “martirizohej” kurbani i radhës. Atentat ndaj Berishës? Mbase! Atentat ndaj opozitës? Me siguri! Kush e ka radhën për në altar?
Jona Koprencka
