(Skenderbeu.info) – “Sulmet ruse në Ukrainë mund të përbëjnë krime lufte”
Sipas Zyrës së Komisionerit të Lartë të OKB-së për të Drejtat e Njeriut sulmet e Rusisë në Ukrainë gjatë dy ditëve të fundit, mund të përbëjnë krime lufte pasi kanë goditur kryesisht objeke civile.
Zëdhënësja e kësaj zyre, Ravina Shamdasani tha se sulmet ndaj zonave civile janë tronditëse.
“Rusia mund të ketë kryer krime lufte gjatë sulmeve me një mori raketash në qytetet e Ukrainës duke vrarë civilë dhe duke shkaktuar ndëprerje të energjisë dhe ngrohjes”, tha zëdhënësja e Zyrës së Komisionerit të Lartë të OKB-së për të Drejtat e Njeriut.
Raketat ranë në kryqëzime rrugësh, parqe dhe zona turistike në kryeqytetin Kiev. Shpërthime u raportuan edhe në Lviv, Ternopil dhe Zhytomyr në Ukrainën perëndimore, Dnipro dhe Kremenchuk në qendër, Zaporizhzhia në jug dhe Kharkiv në lindje.
“Sulmet kundër civilëve dhe objekteve jetike për mbijetesën e civilëve, janë të ndaluara në bazë të ligjeve humanitare ndërkombëtare”, tha zëdhënësja e Komisionerit të OKB-së për të Drejtat e Njeriut.
Më tej, ajo deklaron se “i bëjmë thirrje Federatës Ruse të mos i përshkallëzojë ato më tej dhe të marrë masa të shmangë viktimat në radhët e popullsisë civile dhe të mos godasë infrastrukturën civile”.
Ajo tha se, së paku, 12 civilë janë vrarë dhe mbi 100 të tjerë janë lënduar.
Çfarë ndodhi?
Tronditje dhe tmerr pas valës së shperthimeve të Rusisë në të gjithë Ukrainën.
Orët e dy ditëve të fundit qene një valë shpërthimesh, jo vetëm në Kiev, por në të gjithë vendin, nga Lvivi në perëndim deri në Kharkiv në lindje dhe Odesa në jug.
Për ata që ishin atje kur filloi pushtimi në shkallë të gjerë i Rusisë në shkurt, ka një element deja vu. U thanë që të kalonin sa më shumë kohë në bodrum, pasi sulme të tjera priteshin, duke përdorur raketa dhe dronë.
