Hapet fondacioni “online” për Luiz Ejllin/ Si po përdoret emri i tij për përfitime

(Skenderbeu.info)-Hapet fondacioni “online” për Luiz Ejllin/ Si po përdoret emri i tij për përfitime

Luiz Ejlli është kthyer në personazhin më të komentuar të momentit në Shqipëri. Ejlli është fenomeni që ka rrëzuar shumë personazhe të njohur të botës së showbiz-it, duke kryesuar në “Top lista” me këngën e tij “Me ty”, e cila po shkon drejt 10 milionë klikimeve dhe gjithashtu mban vendin e parë sa u përket klikimeve në “TikTok” me hashtagun me emrin e tij po shkon rreth 5 miliardë.

Së fundi, është hapur një llogari me emrin e tij në “GoFoundMe”, nga familjarët e tij, me justifikimin se shumë njerëz po abuzojnë me emrin e Luizit duke gjeneruar para.

Familjarët kanë sqaruar publikisht se ky hap u ndërmor pas kërkesës së fansave të Luizit, që sipas tyre kanë dëshirë t’i bëjnë dhurata këngëtarit.

Deri tani janë mbledhur diku te 10 mijë dollarë.

Pas këtij veprimi ka pasur shumë dyshime që janë ngritur në rrjetet sociale, ku disa e konsiderojnë si një veprim përfitues dhe janë kundër dhe disa të tjerë e shohin si dhuratë për këngëtarin.

Në lidhje me të gjitha aludimet familjarët e këngëtarit sqarojnë në rrjete sociale përmes një postimi se:

“’GoFoundMe‘ është një platformë amerikane dhe është platforma më transparente e mbledhjes së fondeve për çdo nevojë, plotësim ëndërrash apo ndodhi të tjera jetësore. Prandaj familja zgjodhi këtë platformë zyrtare mbështetje për fansat e Luizit që kanë shprehur këtë dëshirë.

Pas kërkesave të shumta dashamirëse që kemi marrë nga të gjithë fansat e Luizit kemi hapur këtë ‘gofoundme’ për Luizin që menaxhohet nga familjarët e tij. Ky është i vetmi ‘GoFoundMe’ për Luizin”.