Çelet java e “Eurovision 2023” në Liverpul

(Skenderbeu.info)-Çelet java e “Eurovision 2023” në Liverpul

Java më e madhe e festivalit muzikor “Eurovision Song” çelet këtë javë, nga ku do të jenë pjesëmarrëse 37 vende, të cilat do të garojnë me njëra-tjetrën.

Me një të dielë të tapetit aspak tradicional të zgjedhur për këtë vit, artistët kanë parakaluar dhe pozuar për ndjekësit e tyre, duke dhënë edhe intervista të çastit.

Këngëtarja shqiptare, e cila do të përfaqësojë flamurin kuqezi në këtë ngjarje, Albina Kelmendi, së bashku me familjen e saj, kanë mbërritur po ashtu, të veshur në një stil tejet elegant.

Teksa, dy këngëtarët më favoritë aktualisht, sipas edhe sondazheve të shumta, vijnë nga vendet skandinave.

E para, artistja suedeze Loreen, e cila 11 vjet pas korrjes së fitores së saj të madhe në “Eurovision 2012”, rikthehet në skenë me këngën “Tattoo”, për të kërkuar triumfin e radhës.

Nga ana tjetër, artisti finlandez Kaarija vjen me këngën “Cha Cha Cha”, si një miksim i rrymave rap me atë elektronike, për të provuar të çojë në vendin nordik trofeun e mikrofonit të kristaltë.Të tjerë artistë me aspirata të larta këtë Eurovision janë edhe italiani Marco Mengoni, fitues i “Sanremo”-s me këngën “Due Vite”, spanjollja Blanca Paloma me këngën e saj folk “Eaea”, francezja La Zarra me një baladë të titulluar “Evidemment” dhe sigurisht vendasja britanike Mae Muller, me këngën e saj “Wrote a Song”.