(Skenderbeu.info)-BE sanksionon zyrtarët rusë të akuzuar për dhunë seksuale ndaj grave ukrainase
Bashkimi Europian vendosi të martën në mëngjes të sanksionojë nëntë individë, duke përfshirë zyrtarë të lartë të Ushtrisë Ruse të përfshirë në pushtimin brutal të Ukrainës, dhe tre entitete të akuzuara për shkelje të të drejtave të grave.
Kjo shënon herën e parë që blloku përdor regjimin e tij të sanksioneve për të drejtat e njeriut, i krijuar në dhjetor 2020, për të synuar dhunën seksuale.
Vendimi, i miratuar unanimisht nga 27 shtetet anëtare, u mor qëllimisht përpara Ditës Ndërkombëtare të Gruas, e cila festohet më 8 mars në të gjithë botën.
Lista synon gjeneral Nikolay Anatolevich Kuznetsov dhe kolonelin Ramil Rakhmatulovich Ibatullin të forcave të armatosura ruse. Divizionet nën komandën e tyre thuhet se kanë kryer “akte të dhunës seksuale” kundër popullsisë civile të Ukrainës gjatë sulmeve në mars dhe prill të vitit të kaluar.
Akuzat përfshijnë krime të ndryshme të dhunës seksuale, si përdhunimi i një gruaje shtatzënë pranë Kievit dhe pjesëmarrja e ushtarëve në përdhunime në grupe.
