Alibeaj i kundërpërgjigjet Berishës/ “Largimi yt është çlirim për demokratët”

(Skenderbeu.info)-Alibeaj i kundërpërgjigjet Berishës/ “Largimi yt është çlirim për demokratët”

Ish-kryeministri Sali Berisha, sot në një deklaratë për mediat, është shprehur se Enkelejd Alibeaj dhe Lulzim Basha janë të përjashtuar nëjherë e mirë nga PD-ja.

Ai deklaroi se Alibeaj dhe Basha janë pengjet e Ramës dhe se kanë marrë një shpërblim prej tij në shumën 220 mijë euro.

Pas kësaj deklarate, ka reaguar Enkelejd Alibeaj në një status në rrjetet sociale, ku i kundërpërgjigjet Berishës dhe thotë se largimi i tij do të jetë një çlirim dhe frymëmarrje për demokratët.

“Pasi u bojkotua masivisht nga demokratët dhe shqiptarët, Sali Berisha vazhdon të hedhë llum dhe baltë si e vetmja mënyrë për t’i mbijetuar katastrofës së vet elektorale. I përjashtuari i madh nga politika, me 103 mijë vota demokratësh kundër tij e me 200 mijë të tjerë që e refuzuan dëshmoi qartë kush i ka shërbyer kujt!

Edi Ramës i duhet Sali Berisha dhe soji e sorollopi i tij i korruptuar për të justifikuar korrupsionin ku është zhytur ai dhe qeveria e tij.

Unë nuk kam qenë kurrë e nuk jam me parimin e Xenit, për tu paguar për gjithçka.

Sali, dorëheqja ime është akt që shkon për të mirën e demokratëve, largimi yt është çlirim dhe frymarrje për ta.” shkruan Alibeaj.