50 vite nga Revolta e Spaçit/ Mesazhi i Metës: Liria fitohet, nuk dhurohet

(Skenderbeu.info)-50 vite nga Revolta e Spaçit/ Mesazhi i Metës: Liria fitohet, nuk dhurohet

Kreu i Partisë së Lirisë, Ilir Meta, ka përkujtuar sot “Revoltën e Spaçit” të ndodhur 50 vite më parë. Duke e quajtur simbol të shpirtit të pamposhtur, guxim njerëzor dhe sakrificë sublime në mbrojtje të lirisë, demokracisë, shtetit ligjor dhe dinjitetit njerëzor.

Në një status në rrjetet sociale, Meta shkruan se shqiptarët nuk do të pranojnë rikthim në diktaturë, pasi liria fitohet, nuk dhurohet.

“Sot është një ditë kujtese, nderimi, por edhe reflektimi!

Revolta e Spaçit, 50 vite më parë, është shenjuar në memorien kombëtare si simbol i shpirtit të pamposhtur, guximit njerëzor dhe sakrificës më sublime në mbrojtje të lirisë, demokracisë, shtetit ligjor dhe dinjitetit njerëzor.

Akti vetëmohues i zemërluanëve martirë të Spaçit që thyen mitin e paprekshmërisë së regjimit ishte shkreptima që ndriçoi në errësirën e kohës egërsinë e shtetit totalitar. Dhe që frymëzon në çdo epokë përpjekjet dhe qëndresën për mbrojtjen e lirisë dhe demokracisë!

Kurrë më shqiptarët nuk do të pranojnë rikthim në diktaturë! Liria fitohet, nuk dhurohet!”, shkruan Meta.